Дойдубут үрдүнэн бүгүн Учуутал күнэ бэлиэтэнэр. Тыа сиригэр үлэлииргэ сөптөөх усулуобуйа тэриллибит буоллаҕына, эдэр дьон дьиэ туттан, оҕо төрөтөн, кэскиллээх суолу тутуһан олохсуйаллар.
Учуутал идэтэ урут да, билигин да үрдүк суолталаах. Кэнники кэмҥэ тыа сиригэр бэйэлэрин баҕаларынан талаһан тиийэн үлэлиир эдэр педагогтар үксүүллэр.
Петр Егоров аатынан Акана орто оскуолата былырыын үбүлүөйдээх 95 сылын бэлиэтээбитэ, капитальнай өрөмүөн ыытыллыбыта. Күн бүгүн 62 оҕолоох оскуола саҥардыллыбыт, тупсаҕай, сырдык дьиэҕэ-уокка айымньылаахтык үлэлиир. Ол туоһутунан быйыл өрөспүүбүлүкэ “100 бастыҥ учууталларын” ахсааныгар Акана орто оскуолатын  физкултуура  уонна ОБЗР учуутала Николай Барабанскай киирбитэ көрдөрөр. Николай Барабанскай кэргэнэ Мария Никонова нуучча тылын уонна литературатын учууталынан, маны сэргэ иитэр үлэҕэ дириэктэри солбуйааччынан ситиһиилээхтик үлэлиир. Учуутал идэлээх кэргэнниилэр иккиэн да идэлэригэр толору бэриниилээхтик таһаарыылаахтык үлэлииллэр.
Улуус дьаһалтатын пресс-сулууспата.