И призвá обанáдесяте, и начáтъ и́хъ посылáти двá двá, и дая́ше и́мъ влáсть надъ дýхи нечи́стыми. И заповѣ́да и́мъ, да ничесóже вóзмутъ на пýть, тóкмо жéзлъ еди́нъ: ни пи́ры, ни хлѣ́ба, ни при пóясѣ мѣ́ди: но обувéни въ сандáлiя: и не облачи́тися въ двѣ́ ри́зѣ. И глагóлаше и́мъ: идѣ́же áще вни́дете въ дóмъ, тý пребывáйте, дóндеже изы́дете оттýду: и ели́цы áще не прiи́мутъ вы́, нижé послýшаютъ вáсъ, исходя́ще оттýду, оттряси́те прáхъ, и́же подъ ногáми вáшими, во свидѣ́телство и́мъ: ами́нь глагóлю вáмъ, отрáднѣе бýдетъ Cодóмомъ и Гомóрромъ въ дéнь сýдный, нéже грáду томý. И изше́дше проповѣ́даху, да пока́ются: и бѣ́сы мно́ги изгоня́ху: и ма́заху ма́сломъ мно́ги неду́жныя, и исцѣлѣва́ху.