Бүгүн Дьиэ кэргэҥҥэ элбэх өҥөнү оҥорор кииҥҥэ  Чурапчы улууһугар аҕам саастаах дьон декадатын түмүктүүр «Эдэр сааһым ахтылҕана» тэрээһин буолан ааста.

Киирии тылга улуус дьаһалтатын социальнай отделын салайааччыта Алена Пермякова быйылгы ситиһиилэри кэпсээтэ. Социальнай харалта уонна үлэ управлениетын салайааччыта Лидия Тосукаева  кыһалҕалаах дьоҥҥо көрүллэр көмөнү, уларыйыылары иһитиннэрдэ. Дьиэ кэргэҥҥэ элбэх өҥөнү оҥорор киин салайааччыта Мария Саввина «Силис» уһун үйэлэнии бырайыак сыалын-соругун билиһиннэрдэ, куруутун маннык көхтөөхтүк кыттан, үөрэ-көтө кэлэн сынньаныҥ, сэргэхсийиҥ диэн эҕэрдэтин, ыҥырыытын тиэртэ.

Бу тэрээһиҥҥэ "Силис" бырайыак кыттааччылара 70-80-нус сыллардааҕы истиилинэн таҥнан-симэнэн кэлэн, муода көрдөрдүлэр, көхтөөх-нардаах оонньууга кыттан бириистэргэ тигистилэр. «Байаан тула» түмсүү салайааччыта Дмитрий Попов бэйэтин хамаандатынаан кэлэн, байаан доҕуһуолунан ыллатан, эдэр саас кэрэ кэмнэрин санаан, астынан-дуоһуйан, үҥкүүлээн, сүргэлэрэ өрө көтөҕүллэн тарҕастылар.