Администрация МР «Намский улус»

"Араас амтаннаах алгыстаах алаадьы" – кыргыттар саха аһын кистэлэҥнэрин баһылаатылар!

Бүгүн, алтынньы ый 7 күнүгэр, Аҕам саастаахтар күннэрин чэрчитинэн, Е.П. Сивцев аатынан 2 Хомустаах орто оскуолатыгар олус кэрэхсэбиллээх уонна үтүө санаалаах тэрээһин буолан ааста.

Эйэҕэс эбээлэрбит оскуола 5-8 кылаастарын кыргыттарыгар саха аһын астыырга аналлаах "Араас амтаннаах алгыстаах алаадьы" диэн маастар-кылааһы ыыттылар.

Бу күн оскуолабыт «Төрөппүттэр уонна оҕолор» диэн саалата истиҥ уонна сылаас эйгэҕэ кубулуйда. Эбээлэрбит муударай ыйыыларынан-кэрдиилэринэн кыргыттар алаадьыны хайдах сатабыллаахтык астыырга үөрэннилэр. Алаадьы миинньигин ытыйыыттан саҕалаан, амтанын тупсарыы кистэлэҥнэрин, тотоойу буоларын туhуттан эбии эти, оҕуруот аhыттан хаппыыстаны, кабачогу, отонтон дьэдьэни эбии куталларын, хас биирдии хамсаныыны эбээлэрбит сиһилии көрдөрөн, кэпсээн биэрдилэр.

Муударай сүбэлэр уонна минньигэс амтан

Маастар-кылаас кэмигэр кыргыттар алаадьы астааһыныгар эрэ үөрэммэтилэр, эбээлэрбит дьиэ кэргэҥҥэ үтүө үгэстэрин уонна муударай сүбэлэрин кэпсээтилэр. Бу кэпсэтиилэр оҕолорго олоххо, үөрэххэ, дьоҥҥо-сэргэҕэ сыһыаҥҥа саҥа өйүк биэрдилэр.

Астаммыт алаадьы сыта оскуоланы толордо. Оннооҕор уолаттар кэлэн, кыттыhан сааланы толордулар. Оҕолор эбээлэр алгыстаабыт алаадьыларын бэрт сөбүлээн амсайдылар. Хас биирдии амсайыы ахсын, кинилэр улахан үөрүүлэрин, астыныыларын биллэрдилэр.

Үгэстэри салҕааһын

Бу тэрээһин Е.П. Сивцев аатынан 2 Хомустаах орто оскуолатын сахалыы үгэстэри өрө тутууга уонна оҕолорго иҥэриигэ ыытар үлэтин туоһулуур. Маннык маастар-кылаастар эдэр ыччаты төрөөбүт култууратын кытта чугаһаталлар, саха аһын суолтатын өйдөтөллөр уонна дьиэ кэргэн сылаас сыһыанын кэрэһэлииллэр.

Оҕолор уонна эбээлэр икки ардыларыгар истиҥ ситим үөскээтэ, кыргыттар бу күнү умнубат, үтүө өйдөбүллээх күн курдук саныахтара.

Махтанабыт эйэҕэс эбээлэрбитигэр муударай сүбэлэрин, сылаас сүрэхтэрин уонна минньигэс алаадьыларын иһин! Маннык үтүө тэрээһиннэр элбии турдуннар!

Надежда Андреевна Копырина, директоры иитэр үлэҕэ солбуйааччы

Бүгүн, алтынньы 7 күнүгэр, Россия үрдүнэн 9-с төгүлүн Хат дьахтар күнэ бэлиэтэнэр.
Бүгүн Нам улууһугар сарсыардаттан «ВСЁ-БЕРЕМЕННЫМ.РФ" бырайыак чэрчитинэн хат дьахталлары, оҕо күүтэр аҕалары  өйүүр тэрээһиннэр киэҥ далааһыннаахтык ыытылыннылар.

Бу күн ийэ, аҕа буолаары сылдьар дьоҥҥо анаан  Намнааҕы киин балыыһа акушер-гинекологтара маастар-кылаастары ыыттылар, саҥа төрөөбүт оҕону  эмиий үүтүнэн аһатыы, көрүү-харайыы  туһунан лиэксийэлэри аахтылар.  

Эбиэттэн киэһэ улуустааҕы киин библиотекаҕа тэриллибит үөрүүлээх чааска улуус баһылыга Юрий Слепцов, Намнааҕы  Россия социальнай фондун клиентскэй сулууспатын салайааччы Евгений Бурцев эҕэрдэ тылларын тиэртилэр.  
«Беременная – самая красивая” хаартыска күрэҕин кыайыылаахтарын чиэстээтилэр. “Меры государственной поддержки” тиэмэҕэ пособиелары төлөөһүн, «Семья» национальнай бырайыак иитинэн бэриллэр социальнай хантыраак усулуобуйаларын кэпсээтилэр. «Мин уонна оҕом. Таарыйан уоскутар бүрүө” диэн арт-терапия дьарыга барда.

Ону кытта сахалыы боруонса оҥоһуктар атыыга таҕыстылар, кофе-брейк тэрилиннэ, “Tuyaana showroom” маҕаһыынтан, 8 №-дээх аптекаттан уонна “Руслановна” кэрэ буолуу студиятыттан  чэпчэтиилээх купоннар бэлэх оҥоһулуннулар.

Тэрээһини улуус дьаһалтата, Намнааҕы киин балыыһа, нэһилиэнньэ социальнай харысхаллаах буолуутун управлениета иилээн-саҕалаан ыыттылар.
 
“Нам улууһа” МО пресс-сулууспата