📌 500 бейеүсе "Берҙәмлек бейеүе"н башҡарҙы.

Кисә, Милли кейем көнөндә, Башҡортостан Хореография сәнғәте эшмәкәрҙәре берлеге Өфөлә ҙур флешмоб ойошторҙо. Ул Рәсәй халыҡтары берҙәмлеге йылына арналды.

🔥 Флешмобта 27 профессиональ һәм үҙешмәкәр коллективтан 500-ҙән ашыу бейеүсе ҡатнашты.

Улар араһында Стәрлетамаҡ, Салауат, Сибай, Нефтекама, Учалы ҡалалары, Ҡырмыҫҡалы, Дәүләкән һәм Баймаҡ районының Урғаҙа ауылынан килеүселәр булған.

Ҡатнашыусылар төрлө халыҡтарҙың милли кейемдәрендә сығыш яһаны. "Берҙәмлек бейеүе"ндә ете төрлө бейеүҙән өҙөк башҡарҙылар: башҡорт, урыҫ, татар, мари, мордва, сыуаш һәм чечен.

📍 Тиҙҙән тағы ике мөһим сара көтөлә, тип хәбәр итә Республиканың Хореография сәнғәте эшмәкәрҙәре берлеге:

🔹 20 октябрҙә халыҡ бейеүен һаҡлауға һәм үҫтереүгә арналған конференция ойошторола;

🔹 21 октябрҙә Милли бейеү көнөнә арналған байрам концерты үтә. Был иҫтәлекле көн 2025 йылда Башҡортостан Республикаһы Башлығы Радий Хәбиров указы менән булдырылды һәм Фәйзи Ғәскәровтың тыуған көнөндә билдәләнә.

Фото: Эдуард Дилмөхәмәтов.

Башҡорт донъяһы МАХ-та: https://max.ru/channel_bashkortdonja